Vidareutdanning i rusproblematikk, del 1
Studiet byggjer på rammeplan for Vidareutdanning
i rusproblematikk, Kyrkje-, utdannings- og forskingsdepartementet, april
1995.
Høgskulen legg vekt på at vidareutdanninga
skal ha nær kontakt med praksisfeltet, og samarbeider med Midt-Norsk
Kompetansesenter for rusfaget om rekruttering og gjennomføring.
Målgruppe
Vidareutdanninga er retta mot fagpersonell i
helse- og sosialtenesta, som arbeider med rusrelaterte vanskar på
1. og 2. line nivå, i privat og offentleg verksemd. Studiet skal
vere tverrfagleg og tverrsektorielt. Ein vil søkje å nå
målgrupper som har høve til å utvikle samarbeid innanfor
same geografiske område.
Mål for vidareutdanninga
Rusproblematikken vil bli sett inn i eit livsløpsperspektiv.
Utvikling av kritisk refleksjon over kjønnsproblematikk, etiske
vurderingar og eigne haldningar vil vere i fokus.
Studiet har som mål at studentane utviklar:
- forståing og teoretisk kunnskap om avhengigheitsproblematikk
generelt og rusmiddelproblematikk spesielt
- samarbeidsevne, heilskapleg tenking og auka
tverrfagleg innsats innan dei ulike instansar og nivå i russektoren
Faginnhald
Det faglege innhaldet er delt i 2 modular, kvar
på 5 vekttal:
Modul 1: Kunnskap om rusmiddel og rusmiddelbruk
Modul 2: Psykologisk og samfunnsmessig
grunnlagsforståing knytt til arbeid med rusrelaterte
vanskar
Modul 1: Kunnskap om rusmiddel og rusmiddelbruk
I denne modulen set ein fokus på kulturelle
og biologiske aspekt ved rusmiddel og bruk/- misbruk av desse. Studentane
skal skaffe seg kunnskap om korleis rusmiddelbruk er integrert i kulturtradisjonar
og menneskelege fellesskap, og verknader det har på kropp og helse.
Ein vil spesielt sjå på sider av rusmiddelbruk i ulike livsløpsfasar,
samt trekkje fram kjønn og familieaspekt. Temaområde:
- Rus og rusmiddel i eit historisk og kulturelt
perspektiv
- Forklaringsmodellar og epidemiologiske studiar
- Rusmiddel, biologiske og toksikologiske aspekt
- Somatisk og psykisk helse/skadeverknader
- Alder, kjønn og generasjonsperspektiv
- Samfunnsmessige og sosiale aspekt ved rusmisbruk
- Kartlegging og evaluering innan rusfeltet
-Avhengigheitsproblematikk
Modul 2: Psykologisk og samfunnsmessig
grunnlagsforståing knytt til arbeid med rusrelaterte
vanskar
I modul 2 står dei psykologiske, sosiologiske
og samfunnsmessige perspektiva på rusmiddel og rusmisbruk i fokus.
Studentane skal skaffe seg kunnskap om korleis rusmiddel grip inn i menneske
sine strategiar for meistring, konsekvensane dette har for psykisk helse
og for relasjonar og samhandling med andre. Studentane skal utvikle forståing
for terapeutisk arbeid, lovverket og etiske vurderingar knytt til menneske
med rusrelaterte vanskar. Fem hovudtema:
1. Psykologiske tilnærmingar og ferdigheitstrening
2. Sosiologiske og organisasjonsmessige tilnærmingar
3. Lovverket
4. Etikk
5. Rettleiing
Studie og arbeidsformer
Studiet legg vekt på det tverrfaglege,
heilskapssyn og handlingskompetanse. Dette vil få verknad for dei
pedagogiske arbeidsformene. I arbeidet med kunnskapsstoffet tek ein utgangspunkt
i aktuelle problemstillingar som ein møter i feltet. Ein legg
til rette læresituasjonar der studentane får dele røynsler
og reflektere over eigne roller frå arbeidet med rusproblematikk.
Dei lange periodane mellom samlingane krev at
studentane er medvitne på det ansvaret dei har for eiga læring.
Ein vil stimulere til organisering av lokale smågrupper/kollokvieverksemd.
Arbeidskrav og vurdering
Det er krav om 80% frammøte på samlingane.
I tillegg skal ei skriftleg prosjektoppgåve (gruppe el. individuell)
vere stått for å kunne gå opp til skriftleg individuell
eksamen.
Individuell skriftleg eksamen er på 8 timar.
Denne vert vurdert med graderte talkarakterar.
Organisering
Studiet vert lagt opp som deltidsutdanning over
1 år, haustsemesteret 1998/vårsemesteret 1999.
Undervisninga vert tilrettelagt som vekesamlingar
ved Vestmo behandlingssenter i Ålesund. I kvart semester vil det
verte gjennomført 3 vekesamlingar, som svarar til ein modul.
Fagleg ansvarleg
Avdeling
for samfunnsfag v/Institutt for sosialfag
Studieavgift
Studieavgifta er
sett til kr 13.000,-. I tillegg må studentane betale ordinær
semesteravgift,
minimum kr 375,- per semester.
Opptak
Deltakarane bør ha 3-årig høgskuleutdanning
i helse, sosial- eller pedagogiske fag. Det kan også vere aktuelt
å ta opp studentar med universitetsutdanning tilsvarande minimum
40 vekttal innan relevante fagområde. Studentar med annan relevant
utdanningsbakgrunn kan også søkje. For alle søkjarar
gjeld krav om minst 1 års arbeidsrøynsle.Ved opptak vil det
verte lagt vekt på representasjon frå ulike yrkesgrupper og
arbeidsfelt.
Studiet vert sett i gang med atterhald om ressurssituasjonen
ved høgskulen og at det melder seg nok søkjarar.
TILBAKE |
