Regioplan Nordvest
Studiet er retta inn mot det offentlege. Den sentrale
målgruppa er offentleg tilsette i kommunar, fylkeskommunar og statlege
etatar som arbeider med plan- og utviklingsarbeid i nærmiljø,
bygdesamfunn, kommunar eller regionar. Vidareutdanninga høver
også for folkevalde som ønskjer ei planfagleg fundert
tilnærming til tiltaksarbeid, næringsutvikling, bygdeutvikling,
nærmiljøarbeid m.m.
Formål
Regional- og distriktspolitikken saman med sektorpolitikken
er under omlegging slik at det blir stilt krav om at individ, lokalsamfunn
og kommunar må ta eit større ansvar for si eiga utvikling.
Denne omlegginga stiller krav om nye politiske strukturar og prosessar
på lokalt og regionalt nivå. Vidareutdanninga har i første
rekkje eit praktisk siktemål og med stor vektlegging av m.a. kommunale
planleggings- og utviklingsoppgåver knytt både til samfunnsutvikling
og organisasjonsutvikling.
Studiet skal sette studentane i stand til:
- å finne lokale handlingsmulegheiter
i lys av globale utfordringar og nasjonale mål
- å bygge opp partnerskapsorganisasjonar
mellom privat, offentleg og frivillig sektor
- å arbeide i prosessar med vekt
på dialog, kommunikasjon, nyskaping og demokrati
- å fungere som leiarar for regionale
og lokale plan- og utviklingsprosjekt
Organisering og innhald
Studiet er sett saman av fem vekesamlingar, tre
i haustsemesteret og to i vårsemesteret. Kvar samling er sett saman
av 20 timar forelesing og 15 timar gruppearbeid. Samlingane går over
fem dagar frå måndag lunsj til fredag lunsj.
Dei fem samlingane tek føre seg desse temaområda:
RP1 - Innføring i offentleg planlegging
RP2 - Kommunikativ planlegging og kreativ problemløysing
RP3 - Prosjektplanlegging og prosjektarbeid
RP4 - Lokal planlegging, nærmiljø-
og tiltaksarbeid
RP5 - Kommunal og regional framtid - scenarioteknikkar
Undervisningsformer som legg vekt på open
kommunikasjon og kreativ problemløysing blir prioriterte. Gjennom
presentasjon og bearbeiding av planleggingsteoriar og eigne erfaringar
med utviklingsarbeid, får studenten hjelp til å reflektere
over eigen situasjon og vidareutvikle eigen kompetanse i plan- og utviklingsarbeid.
Det er ein føresetnad at studentane driv sjølvstudium mellom
samlingane. Pensumet er omlag 2000 sider.
For å utnytte gjesteforelesarar m.m. er
forelesingane for studiet Regioplan Nordvest og delfaget Regional planlegging
og utvikling (del av vidareutdanninga i «Offentleg planlegging, organisering
og leiing») samordna.
Studiestad: Volda
Eksamen og kompetanse
Det blir halde ein 8 timars skriftleg individuell
eksamen om våren. Stått eksamen gir 10 vekttal og kan inngå
i ein cand. mag. grad.
Fagleg ansvarleg
Avdeling
for samfunnsfag v/Institutt for kommunalfag.
Studieavgift
Studieavgifta er sett til kr 4.900,-. I tillegg
må studentane betale ordinær semesteravgift,
minimum kr 375,- per semester.
Studentane/arbeidsgjevarane dekkjer reise, opphald,
pensumlitteratur, m.m. Kommunar/organisasjonar som stiller med fleire
studentar, betaler redusert studieavgift utover den første.
Opptak
Grunnlag for opptak er generell studiekompetanse,
relevant høgare utdanning eller minst 4 års yrkespraksis frå
offentleg forvaltning eller andre relevante område. Stor politisk
aktivitet kan sidestillast med yrkespraksis. Studiet har plass til 20 studentar,
som ein reknar med fullfører heile studiet. I tillegg er det mogleg
å få ta del i delar av studiet/temasamlingar.
TILBAKE |
