Høgskulen i Volda 
Kontoret for etter- og vidareutdanning 
Boks 500  6101 Volda

 
Høgskulen i Volda sine fleksible vidareutdanningar studieåret 1998/99
 
 
Andre fleksible vidareutdanningar 1998/99: 

Pedagogisk arbeid på småskulesteget 

2. 10-vekttalseining 

Studiet byggjer på rammeplan for 10+10 vekttal Vidareutdanning i pedagogisk arbeid på småskulesteget. Formålet med dette studiet er å gi studentane kvalifikasjonar til å realisere måla for det nye småskulesteget. Dei må lære å kjenne sin eigen funksjon som lærar, og dei må tileigne seg kunnskap og dugleik dei treng som lærarar på småskulesteget. Dei må lære å forstå og verdsetje kva barna kan og veit, slik at barna får oppleve at skulen gir hjelp til å vidareutvikle det dei alt har tileigna seg. Det same gjeld den kulturen barna skaper seg i mellom. Gjennom  studiet skal studentane få inspirasjon til å forme småskulesteget slik at det kan bli ein god skule både for seksåringane og dei større barna. Studentane må få innsikt i kor viktig det er å samarbeide med foreldra og gjere seg nytte av den ressursen dei er i dette arbeidet.  

Studiet er ei påbygging for dei som allereie har gjennomført 10-vekttalseininga Pedagogikk for barn 5-10 år eller tilsvarande. 

Organisering 
Studiet vert organisert med undervisning gitt i helgesamlingar  (fredag ettermiddag og laurdag føremiddag) over to semester, dvs. haust 98 og vår 99. Vi har planar om å starte opp studiet både i Ålesund og Kristiansund parallelt, avhengig av talet på søkjarar til dei ulike tilboda.   

Innhald 
Småskulesteget vil ha elevar i alderen 6 - 10 år. Eigenarten til steget vil stå i sentrum for studiet, men overgangsproblem både i forhold til barnehagen og mellomsteget vil kome inn. Stoff som er særleg aktuelt for 2. - 4. klasse vil ligge i 2. 10-vekttalseining. Det gjeld t.d. ulike emne omkring ekstra hjelp og støtte og emne om eit fleirkulturelt samfunn.  

Studentane skal gjennomføre eit prosjektarbeid. For at førskulelærar og allmennlærar skal lære å kjenne kulturen og arbeidsmåtane til kvarandre , blir det tilrådd at dette arbeidet vert gjennomført i grupper der begge studentgruppene er representerte. 

To veker praksis er ein obligatorisk del av studiet, og arbeidet i praksistida kan knytast til prosjektoppgåva. 

Eksamen og kompetanse 
Den avsluttande vurderinga omfattar: 
· Skriftleg individuell eksamen vurdert etter gradert skala 
· Prosjektarbeid vurdert av ekstern sensor 
  
Fullført studium gir 10-vekttal og kan inngå som ein del av ein cand.mag.-grad. 

Fagleg ansvarleg  
Avdeling for lærarutdanning v/pedagogikkseksjonen. 

Studieavgift 
Kristiansund 
Studieavgifta er sett til kr 15.000,-. I tillegg må studentane betale ordinær semesteravgift, minimum kr 375,- per semester. 

Ålesund 
Studieavgifta er sett til kr 15.000,-. I tillegg må studentane betale ordinær semesteravgift, minimum kr 375,- per semester. 

Opptak 
Grunnlag for opptak er anten fullført førskulelærarutdanning eller allmennlærarutdanning, samt fullført 10-vekttalseining i Pedagogikk for barn 5-10 år. 

Studiet vert sett i gang med atterhald om ressurssituasjonen ved høgskulen og at det melder seg nok søkjarar. 
 

TILBAKE
 

Kontoret for etter- og vidareutdanning (KEV) 
E-post: kev@hivolda.no