Generelle opplysningar

På desse heimesidene presenterer vi Høgskulen i Volda sine fleksible/avgiftsfinansierte vidareutdanningar for studieåret 1998/99. 

Med vidareutdanning meiner vi studium som er eksamensretta og gir formell kompetanse (vekttal). For å bli teke opp som student ved desse tilboda, nyttar ein eit eige søknadsskjema som de får tilsendt ved å kontakte høgskulen.

Organisering
Ved å variere undervisningsstaden, ønskjer vi å ta omsyn til ulike regionale behov. Vi prøver også å tilpasse undervisninga til deltakarane sine behov for å kombinere utdanning med ein jobb- og familiesituasjon, og undervisninga vert difor i hovudsak lagd til ettermiddags- og kveldstid, som helgesamlingar og konsentrerte vekesamlingar av ulik lengd. Vi tek også i bruk alternative former for tilrettelagt undervisning, t.d. forelesingar og kollokviering på Internett.

Kostnader
Vidareutdanningstilboda vil i hovudsak verte finansierte ved hjelp av studieavgift frå kvar einskild deltakar. (Sjå konkrete kostnader under kvart studietilbod.)  Denne avgifta vert bestemt ut frå dei faktiske kostnader, som m.a. er utgifter til fagleg leiing og undervisning, rettleiing, praksis, eksamensavvikling, sensur og div. administrasjon, samt leige av lokale og reisegodtgjersle. Dette er kostnader som varierer noko frå tilbod til tilbod, og fører difor til ulike storleikar på studieavgiftene.

Binding/kontraktfesting
Vidareutdanningane vert sett i gang med atterhald om ressurssituasjonen ved høgskulen og at det melder seg nok søkjarar.  Deretter må vi sikre studiekvaliteten, og når alle avtalar om undervisning og anna oppfølging av studiet er gjort, er vi bundne opp av dette økonomisk. Gjennomføring av studia er såleis avhengig av at deltakartalet held seg oppe, og kvar einskild deltakar må difor skrive under på ein studiekontrakt. Denne kontrakten er gjensidig forpliktande, og særlege reglar gjeld for oppheving av kontrakten.

Betaling
Deltakarar på vidareutdanningane vert registrerte som studentar ved høgskulen, med dei rettar og plikter dette omfattar. Krav om innbetaling av studieavgift og semesteravgift vert sendt ut omlag midt i kvart semester. For studium som varer lenger enn eit semester, vert studieavgifta fordelt på kvart semester.