Viss du ristar på butanboksen, høyrer du at innhaldet er flytande. Det er fordi det er så høgt trykk i boksen at gassen blir flytande. Gassen tar mindre plass når han er flytande. På Kårstø lagrar dei butan og isobutan på flytande form.

Butan finst i naturgass og er ein våtgass.

Kjemisk formel for butan er C₄H₁₀.

Isomere bindingar

Butan finst i to isomere former: normal-butan og isobutan. Desse to formene for butan har samme kjemiske formel (elles ville det ikkje vore butan), men strukturformlane er forskjellige (sjå bileta). Medan karbonatoma i normalbutan er bundne saman i ei rekkje (sjå over), er karbonatoma i iso-butan bundne saman i ei forgreina kjede (sjå under).

Isobutan

Kjemisk formel for isobutan er C₄H₁₀.

Isobutan har andre kjemiske eigenskapar enn normalbutan.

Isobutan er ein fargelaus, brennbar gass som finst i naturgass. Isobutan kan òg lagast ved cracking (knusing) av petroleum i oljeraffineri.

Av isobutan lagar ein bensinkomponentar med høge oktantal.